Zanzibar yaomba msaada Iran

 

 Zanzibar inataka kunufaika na uwezo wa kitaalamu wa Jamhuri ya Kiislamu ya Iran.  Hayo yamesemwa na Rais wa Zanzibar  Ali Mohammad Shein wakati alipokutana na Waziri wa Mambo ya Nje wa Iran Mohammad Javad Zarif mjini Zanzibar siku ya Alkhamisi. Katika kikao hicho Shein ameashiria nafasi muhimu ya Jamhuri ya Kiislamu ya Iran katika eneo na hivyo ametaka msaada wa Iran katika kuboresha sekta ya afya Zanzibar na vile vile katika ustawi wa kilimo, uvuvi na uimarishwaji elimu za kiufundi Zanzibar. Kwa upande wake Zarif ameashiria uhusiano wa kale na wa kihistoria baina ya Iran  baina ya  mataifa ya Iran na Zanzibar. Ameongeza kuwa,  Jamhuri ya Kiislamu ya Iran, kwa mujibu wa uwezo wake, iko tayari kuimarisha ushirikiano wake na Zanzibar katika sekta  za utamaduni, uchumi, biashara, kilimo, afya na  turathi za utamaduni. Zarif ameelezea matumaini kuwa katika kikao kijacho cha kiuchumi baina ya pande mbili kitafanyika kwa mhimili wa kuimarisha uhusiano katika sekta ya kilimo. Waziri wa Mambo ya Nje wa Iran amekuwa akizitembelea nchi za Afrika Mashariki kutoka siku ya Jumapili ambapo amefanya ziara ya kufana katika nchi za Kenya, Uganda, Burundi na Tanzania. Baada ya kumalizia safari yake hiyo huko Zanzibar nchini Tanzania, Alkhamisi usiku Zarif  alielekea mjini Munich Ujerumani kuhudhuria Mkutano wa Kimatiafa wa Usalama wa Munich na pia kwa ajili ya mazungumzo ya nyuklia. Akiwa Munich anatazamiwa kufanya mazungumzo na mawaziri wa mambo ya nje wa Russia, China, Ufaransa, Uingereza, Marekani na Ujerumani wanaotazamiwa kuhudhuria kikao hicho.